நான் மற்றும் மேலும் சில!

பல நாள் கழித்து நான் 'நான்' படம் பார்த்தேன் (எப்படி வேண்டுமானாலும் அர்த்தம் கொள்ளலாம்!!!). "Naan" என்று கூகிள் இமேஜ் சர்ச் செய்ததில் இந்தப் படம்தான் கிடைத்தது - ஹி ஹி ஹி! :) வழக்கமான கோலிவுட் பாணியில் இருந்து விடுபட்டு மாறுதலான கதைக்களனுடன் வந்திருக்கும் படம். குறைகள் கண்கூடாக உறுத்தினாலும், படம் சுவாரசியமாக இருந்தது! வாழ்க்கையைத் தொலைத்த ஒருவன், இறந்து போன எவனோ ஒருவனின் அடையாளத்தை திருடி புதிதாய் வாழ நினைப்பதுதான் படத்தின் கான்செப்ட். நல்ல வேளையாக நாம் பார்த்து சலித்த ஆள் மாறாட்ட காமெடிப்(!) படங்களைப் போலில்லாமல், கொஞ்சம் கிரைமும் கொஞ்சம் த்ரில்லும் தடவிய சாண்ட்விச்சாய் வந்திருக்கிறது. விஜய் ஆண்டனி அமைதியாக நடித்துள்ளார் - இந்தப் படத்திற்கு தேவையான நடிப்பு இவ்வளவுதான் (அந்த அழுகைக் காட்சியைத் தவிர). ஆனாலும், அவரது உண்மையான நடிப்புத் திறமை இனி வரும்(?) படங்களில்தான் தெரியும்! சித்தார்த் கவர்கிறார், மக்காயல பாட்டு கலக்கல் - சித்தார்த் ஓஓ என கண்களையும், உதடுகளையும் குவித்து பாடுவது நல்ல காமெடி. அவருக்கு போட்டியாக ரூபா மஞ்சரியின் டேன்ஸ் ஸ்டெப்புகள் செம காமெடி. இவை போதாதென்று, படத்தில் காமெடி இல்லாத குறையை அந்த போலிஸ் ஆஃபிஸர் தீர்த்து வைக்கிறார் - இவ்வளவு மொக்கையாக புலன் விசாரணை செய்யும் போலீஸை இது வரை பார்த்ததில்லை. குறைகள் பல இருந்தாலும், நான் - நல்ல டைம் பாஸ்!

'நான் ஈ' தயாரிப்பாளர்கள் இந்தப் படத்தின் மீது வழக்கு தொடராதது ஆச்சரியம்தான். 'ஆனந்த தாண்டவம்' படத்தின் தயாரிப்பாளர்கள் தாண்டவம் தலைப்பின் மீது இன்னமும் வழக்கு போடாதது அதை விட ஆச்சரியம்! :) வெளிவராத இரண்டு படங்கள் ஒரே மாதிரியான தலைப்புகளைக் கொண்டிருந்தால்தான் இந்த பிரச்சினையோ?! ;)

கிழடு தட்டியிருந்தாலும் விக்ரமின் தாண்டவம் பட ஸ்டில்கள் (சில) அசத்தலாக உள்ளன. ஆனாலும் தமிழ் சினிமா ஸ்டில்களையும், போஸ்டர்களையும், டிரைலர்களையும் கொஞ்சமும் நம்ப முடியாது! இது போன்ற ஸ்டைலான புரமோஷன்களை நம்பி படம் பார்க்கப் போனால் - ஏதாவது ஒரு பாடல் காட்சியில் அந்த பில்ட்-அப்புகள் சில நொடிகளில் தோன்றி மறையும்!

அப்புறம் Expendables 2 படம் பார்த்தேன், இரைச்சலான படம். இருந்தாலும் "Rest In Pieces " என்ற அந்த ஒரு டயலாகுக்காகவே பார்க்கலாம்! :) வான் டம்மா அது? ஹ்ம்ம்... காலத்தின் கோலம்!!!

இப்போது புதியதாய் வரும் தரமான தமிழ் காமிக்ஸ்கள் புத்தகங்கள் ஒவ்வொன்றும் என்னுடைய ஒரு சில நாட்களை விழுங்கி விடுகின்றன - படிப்பதையும், பதிவிடுவதையும் சேர்த்து! அப்படி என்ன பெரிதாக அதில் இருக்கப்போகிறது என நினைப்பவர்கள் இதைப் படியுங்கள்!:
வன்மேற்கின் வஞ்ச நெஞ்சங்கள் - முத்து காமிக்ஸ் வைல்ட் வெஸ்ட் ஸ்பெஷல்!

தமிழ்மணம் Certified!

மினி ப்ளேடை தொடர்வதும், தொடராததும் தமிழ்மணத்தின் கையில் இருப்பதாக இந்த ப்ளேட்பீடியா பதிவில் தெரிவித்திருந்தேன்! இன்று kuttiblade.com தமிழ்மணத்தில் இணைக்கப்பட்டுள்ளதாக மின்னஞ்சல் வந்தது - அவர்களுக்கு என் மனமார்ந்த நன்றிகள்! இனி போஸ்ட் கார்டு பதிவுகள் தொடரும், ஜாக்கிரதை! :) இந்தப் பதிவில் எழுத பெரிதாய் மேட்டர் இல்லாததால் ஒரு சிறிய (சுய)பரிந்துரை மட்டும்! எனது மற்ற தளமான ப்ளேட்பீடியாவில், பெங்களூரில் சென்ற வார இறுதியில் நடைபெற்ற காமிக் கான் கண்காட்சி குறித்த சிறப்பு பதிவுத் தொகுப்பினை இங்கே காணலாம்! உங்களுக்கு காமிக்ஸ் பிடிக்குமோ இல்லையோ, இந்தப் பதிவுகளைப் படித்தால் பல சுவாரசியத் தகவல்களை தெரிந்து கொள்ளலாம்! ;) 

1. காமிக் கான் எக்ஸ்பிரஸ் 2012 கண்காட்சி, பெங்களூர் - ஒரு அறிமுகம்!
2. சிங்கத்தின் சிறு குகையில் - ப்ளேட்பீடியா @ காமிக் கான் பெங்களூர்! - பகுதி 1
3. பெங்களூரில் நேற்று நிகழ்ந்த பதிவர் சந்திப்பு!
4. பெங்களூரில் ஒரு தமிழ் புத்தக வெளியீட்டு விழா!
5. நான் எடுத்த முதல் கத்துக்குட்டி வீடியோ பேட்டியும், மிஷ்கினின் போட்டோவும்!

6. காமிக் கான் எக்ஸ்பிரஸ் 2012 - நிறைவுப் பதிவு - ஒரு இனிய அனுபவம்!
   

CFL-ஆ, டியூப் லைட்டா?!

CFL-தான் சிறந்தது என்று எல்லாரும் சொல்கிறார்கள். ஆனால், ஹாலிலோ அல்லது பெரிய அறைகளிலோ CFL பல்புக்களை மாட்டினால் தூங்கி வழிகிறது! என்னதான் 20W அல்லது 30W CFL வாங்கிப் போட்டாலும், ஒரு சாதாரண டியூப் லைட்டின் வெளிச்சத்தை அடித்துக்கொள்ள முடியாது! 9W CFL பல்ப்பின் வெளிச்சம், 40W குண்டு பல்ப்பின் வெளிச்சத்துக்கு ஒப்பானது என்று வாங்கும்போது நமக்கு பல்பு கொடுக்கிறார்கள்! :D ஆனால், அதுவோ ஒப்புக்குத்தான் வெளிச்சம் தருகிறது. பால்கனி, சிறிய அறை, குளியலறை, கழிவறை இவற்றிற்கு மட்டும்தான் இவை உகந்தது என்று நினைக்கிறேன்! 5W மஞ்சள் நிற CFL-ஐ படுக்கையறையில் போட்டால், அந்த மந்த வெளிச்சத்தில் உடனே தூக்கம் வந்து விடுகிறது! :D வீட்டில் எல்லா அறைகளிலும் CFL இருக்கிறது - மந்தகாசமான மாலை வேளைகளிலும், அதிக நேரம் TV பார்க்கும் போதும் மட்டுமே அவை உபயோகமாகின்றன! மற்ற சமயங்களுக்கு, சாதாரண டியூப் லைட் 36W என்பதால் அதற்கு பதிலாக 28W ஸ்லிம் லைன் டியூப் லைட் செட்களை மாட்டி இருக்கிறேன்! சான்சே இல்லை, ஒளிமயமான வாழ்வுதான்! :) மூன்று வருடங்களில் ஒரு தடவை கூட ஃப்யூஸ் ஆனது கிடையாது! :)

இன்னும் சில வருடங்களில் LED லைட்டுகள், CFL-இன் இடத்தை கைப்பற்றி விடும்! ஆனால் டியூப் லைட்டுகளின் எதிர்காலம் இன்னமும் பிரகாசமாகவே உள்ளது என்று நினைக்கிறேன்! :)

பெங்களூரில் காமிக்ஸ் திருவிழா - Comic Con Express 2012!

பெங்களூரில் இம்மாதம் 7 மற்றும் 8 ஆம் தேதி (சனி, ஞாயிறு) - Comic Con Express 2012 கண்காட்சி நடைபெறவிருக்கிறது! காமிக்ஸ் இரசிகர்களுக்கு கொண்டாட்டம்தான்! மற்றவர்களும் கலந்து கொள்ளலாம், அனுமதி இலவசம்! மதிய உணவை அருகில் உள்ள ஓட்டல்களில் சொந்த செலவில் சாப்பிட்டுக் கொள்ளலாம்! ;) காமிக்ஸ் தவிர்த்து வீடியோ கேம்கள், அனிமேஷன் மற்றும் சினிமா சார்ந்த ஸ்டால்களும் இருக்கும் என தெரிகிறது! மேலதிகத் தகவல்களுக்கு இங்கே செல்லவும்! தமிழ்நாட்டில் இப்போதைக்கு ஒண்ணே ஒண்ணு, கண்ணே கண்ணு என்று காமிக்ஸ் வெளியிட்டுக் கொண்டிருக்கும் பிரகாஷ் பப்ளிஷர்ஸின் ஸ்டாலும் இவ்விழாவில் இடம் பெறப் போகிறது! லயன் காமிக்ஸின் அடுத்த வெளியீடான Wild West ஸ்பெஷல் இவ்விழாவில் வெளியிடப்படுகிறது என்பது கூடுதல் தகவல் - கௌபாய் (காமிக்ஸ் / சினிமா) இரசிகர்கள் கவனத்திற்கு! பெங்களூரில் வசிக்கும் தமிழ் படிக்கத் தெரிந்தவர்கள்(!), தமிழ் காமிக்ஸ் இதழ்களை வாங்க இது அருமையான வாய்ப்பாக இருக்கும் என்பதில் சந்தேகமில்லை!

இது குறித்த லயன் காமிக்ஸ் எடிட்டர் விஜயனின் சிறப்புப் பதிவை இங்கே பார்க்கலாம்!: மேற்கே ஒரு பயணம்!

புது டம்ளரில் குடிக்க மாட்டேன்!

புதிய ஸ்டெயின்லெஸ் ஸ்டீல் பாத்திரங்களில், அவற்றை தயாரித்த அல்லது விற்பனை செய்யும் நிறுவனங்களின் ஸ்டிக்கர்கள் ஒட்டி இருப்பதை கவனித்திருப்பீர்கள்! அந்த ஸ்டிக்கரை பிரிக்க முயற்சி செய்திருக்கிறீர்களா?! துணிகளில் இருக்கும் கிரீஸ் கரையை கூட நீக்கி விடலாம் ஆனால் இந்த ஸ்டிக்கரை முழுதாக நீக்க முடியாது! நகத்தை கொண்டு உரித்தால் ஸ்டிக்கரின் மேற்பகுதி மட்டும் தனியாக பிரியும், பிறகு வெண்மையான ஸ்டிக்கரின் அடிப்பகுதி தெரியும்! அப்படி எதைக் கொண்டுதான் ஒட்டுவார்களோ தெரியவில்லை, கொலைவெறியோடு சுரண்டினாலும் ஆங்காங்கே பசையும், அரைகுறையாய் கிழிந்த ஸ்டிக்கரும் நமக்கு பெப்பே காட்டும்! சோப்புத் தண்ணீரில் ஊற வைத்தாலும் வராது! பசையின் வீரியத்தைப் பொறுத்து ஸ்டிக்கர் முழுவதுமாய் பிரிய சில மாதங்களோ அல்லது சில வருடங்களோ ஆகலாம்!!! இதற்காகவே புது டம்ளரில் குடிக்க (குடிநீர் அல்லது காஃபிதான்!) விரும்புவதில்லை. பிசுக் பிசுக் என்று விரல்களில் பசை ஒட்டினாலே எரிச்சலாக இருக்கும், இதே காரணத்திற்காக புதுத் தட்டிலும் சாப்பிடுவதில்லை! :)

அன்புள்ள பாத்திர தயாரிப்பாளர்களே, வியாபாரிகளே பாத்திரங்கள் உங்கள் நிறுவனத்தில்தான் வாங்கப்பட்டது என்ற பேருண்மை, நாங்கள் அதை வாங்கும் போதே எங்களுக்கு தெரியும்! எப்போதாவது எட்டிப் பார்க்கும் விருந்தாளிகளுக்கு இந்த பாத்திரங்களின் வடிவமைப்பு பிடித்திருந்தால் 'எந்த கடையில வாங்கினீங்க, நல்லா இருக்கே!' என்று எங்களிடம் கேட்டுத் தெரிந்து கொள்வார்கள்! எனவே, தயவு செய்து பாத்திரங்களில் ஸ்டிக்கர் ஒட்டாமல் அல்லது எளிதில் பிரியகூடிய வகை ஸ்டிக்கர்களை மட்டுமே ஒட்டி விற்றால் அவை எங்கள் கைகளில் ஒட்டாமல் இருக்கும்!

உங்கள் பதிவுகள் பிறரின் வலைப்பூக்களில் தெரிய வேண்டுமா?!

நீங்கள் ஒன்றுக்கு மேற்பட்ட வலைப்பூக்கள் வைத்திருந்தால், ஒரு வலைப்பூவின் முகப்பில் மற்றதன் சமீப பதிவுகளை காண்பிக்க விரும்பலாம் (ஒரு விளம்பரம்தான் ;) இடது பக்கம் பார்க்க!). அல்லது உங்கள் அபிமான வலைப்பூக்களில் ஏதாவது ஒன்றின் - உதாரணத்திற்கு Bladepedia-வின், சமீபத்திய சில பதிவுகளை உங்கள் வலைப்பூ முகப்பில் பட்டியலிட விரும்பலாம்! அப்படிச் செய்ய உங்களுக்கு அந்த வலைப்பூவின் RSS feed அட்ரஸ் தெரிந்திருக்க வேண்டும்! Bladepedia-வின் RSS feed இதோ:
http://www.bladepedia.com/feeds/posts/default

ப்ளாகின் Layout பகுதிக்கு சென்று 'Feed' Gadget-ஐ நிறுவுங்கள்!

www.blogger.com --> உங்கள் ப்ளாக் பெயர் மீது ஒரு கிளிக் --> இடப்பக்கம் Layout மீது ஒரு க்ளிக் --> வலப்பக்கம் தேவையான இடத்தில் "Add Gadget" மீது ஒரு க்ளிக் --> Basics --> Feed --> "Configure Feed" Gadget இப்போது திறக்கும் --> "Feed URL"-க்கு எதிரே http://www.bladepedia.com/feeds/posts/default என்ற முகவரியை கொடுத்து விட்டு "Continue" மீது ஒரு க்ளிக்! படத்தில் காட்டியது போல், Feed-க்கான தலைப்பு, எத்தனை பதிவுகள் தெரிய வேண்டும் போன்ற விவரங்களை தெரிவு செய்து விட்டு --> Save மீது ஒரு க்ளிக்! --> அவ்ளோதான்!

இப்போது உங்கள் வலைப்பூவை (ரெப்ரெஷ் செய்து) பார்த்தால், ப்ளேட்பீடியாவில் இருந்து சமீபத்திய 5 பதிவுகளின் சுட்டிகள் உங்கள் வலைப்பூவை அலங்கரிக்கும்! உங்களுக்கு Bladepedia பிடிக்கவில்லை என்றால், மாறாக இந்த feed முகவரியை கூட பயன்படுத்தலாம்: http://www.kuttiblade.com/feeds/posts/default - அல்லது யாருடைய வலைப்பூவில் உங்களுடைய பதிவுகள் தெரியவேண்டும் என்று நினைக்கிறீர்களோ அவர்களிடம் உங்கள் வலைப்பூவின் RSS Feed முகவரியை கொடுத்து மேற்காணும் முறையை பின்பற்ற சொன்னால் போதுமானது! அப்பாடா தலைப்பு Justified!

கற்பிழந்த கார்கள்!

சுப்ரீம் கோர்ட் தீர்ப்பின் எதிரொலியாக, பெங்களூர் ட்ராபிஃக் போலீஸ் - 'கார்களில் உள்ள சன் ஃபிலிமை அகற்ற வேண்டும்' என்று சில மாதங்களுக்கு முன் அறிவித்ததுமே நீதிக்கு தலை வணங்கி, கார் கண்ணாடிகளின் கற்பை ஆள் வைத்து சூரையாடினேன்! உறித்த கோழி போலாகி விட்ட காரை, வெளியில் எடுக்கவே சங்கடமாக இருக்கிறது! கீறல் விழுந்த கண்ணாடி வழியாக பார்த்தால் ரோடு, கோடு கோடாக தெரிகிறது! சிக்னலில் நிற்கும் போது பக்கத்து வண்டிக்காரர்கள் ஆவலாய் காருக்குள் நோட்டமிடுகிறார்கள்! வெயில் அடித்தால் கண்கள் கூசுகின்றன! இதை எல்லாம் கூட பொறுத்துக் கொள்ளலாம்! முக்கால்வாசி பேர் இன்னமும் கார்களில் சன் ஃபிலிம் அகற்றாமலேயே பவனி வருகிறார்கள்! அவர்களின் நக்கலான பார்வையைத்தான் தாங்க முடியவில்லை!

லட்சக்கணக்கில் ஃபைன் கலெக்ஷன் செய்ததாக செய்திகள் மட்டும் வெளியாகின்றன! ஆனால், ட்ராபிஃக் கான்ஸ்டபிள்களோ இன்னமும் ஹெல்மெட் அணியாமல் பைக் ஓட்டுபவர்களை பிடிப்பதில் மட்டுமே ஆர்வம் காட்டுகிறார்கள்! ரோட்டை அடைக்காமல் 'காரியத்தை முடிக்கலாம்' என்பதுதான் காரணமா என்று தெரியவில்லை! சன் பிலிம் அகற்றாத கார்களையும் வளைச்சு வளைச்சு பிடிங்க சார், ப்ளீஸ்! தமிழ்நாட்டுல நிலைமை எப்படி?!

முதல் (குறும்)பதிவு!

நண்பர்களே, வணக்கம்! என் பெயர் கார்த்திக்! ஏற்கனவே www.bladepedia.com என்ற வலைப்பூவில் எழுதி வருகிறேன்! 'அப்புறம் ஏன் இந்த வெட்டி வேலை?!' என்று நீங்கள் கேட்கலாம்! ப்ளேட்பீடியாவிற்கு என்று ஒரு இமேஜ் உள்ளது (அப்படியா?)! ஓரளவு உபயோகமுள்ள(!) பதிவுகளாக எழுதி வருகிறேன்! சரி, முறைக்காதீர்கள்! டீல் இதுதான் - பக்கம் பக்கமாய் எழுதினால் அது ப்ளேட்பீடியாவிலும், பத்தி பத்தியாய் எழுதினால் அது குட்டிப்ளேடிலும் வெளிவரும்! :) எழுத நிறைய விஷயங்கள் இருக்கிறது, ஆனால் அவற்றை எல்லாம் ப்ளேட்பீடியாவில் எழுதி மொக்கை போட விரும்பவில்லை! எழுத வேண்டும் என்று நினைப்பதை, அதிகம் அலட்டிகொள்ளாமல் ஒரு போஸ்ட் கார்டில் எழுதுவதைப் போல, சட்டென்று casual ஆக எழுதத்தான் இந்த புதிய வலைப்பூ!

இதையே ட்விட்டரிலோ, ஃபேஸ்புக்கிலோ, கூகிள் பிளஸ்ஸிலோ செய்யலாம்தான்! ஆனால் அப்படி எழுதினால் தமிழ்மணம் போன்ற திரட்டிகளில் வந்து தொலைக்காதே! ;) அதுவுமன்றி, அந்தத் தளங்களில் எனது நண்பர்களின் எண்ணிக்கையும் மிகக் குறைவே! இந்த தளத்திற்கு என்ன பெயர் வைப்பது என்பதே பெரிய குழப்பமாகத்தான் இருந்தது! நான் பரிசீலித்த பெயர்களில் சில:
| குட்டிப்ளேடு! | குறும்பதிவு! | குறும்பதிவன்! | போஸ்ட் கார்டு பதிவுகள்! |

எனது அதி தீவிரவாதி வாசகர் திண்டுக்கல் சரவணன், வலைப்பூ பெயரில் ஒரு 'ப்ளேடு டச்' இருக்க வேண்டும் என விரும்பியதால் குட்டிப்ளேடு தேர்வாகியது! சரி, வளவளவென எழுதினால் இந்த வலைப்பூவின் நோக்கம் தோற்று விடும்! எனவே, இப்போதைக்கு bye-bye! :)